LE BONE MANIERE, EL BON-TON
Tanti ga apressà el nostro sforso de sgrezarse un poco, seguendo i nostri
consili sul "bon ton", che no'l ze el pesse preferito dal Presidente
dela region Galan, ma invesse le bone grassie, le bone maniere, par saverse conportare
in modo corèto in ogni ocasiòn.
Quando se sbarufa co uno, no ocore dirghe, par spaventarlo: "Te verzo come
'na tenca e po balo el cià-cià-cià sora el to cadàvaro".
Basta anca el più educato: "Te ronpo la testa parché no te
vaghi via sòto" che ze na sotile batutina par dire che dela persona
se apressa più le doti fisiche che no l'inteligensa.
E alo stadio: ze proprio ora de finirla! Semo stufi de sentire i cori con i soliti
"Bécoooo.... cornutooooo, bruto fiol de 'na..." oltretuto maleducati
e scarsi de fantasia. Ve proponemo, in alternativa, dei insulti manco gresi, anca
se molto intensi. Ecoli: "Arbitroooo ciapa el supiàroeo e va a dirigere
el trafico in càmara de to mojere!"... "Se i mussi svoeàsse
to mare gavarìa da darte da magnare co la fionda!"... Finìmo
col più rurale e tuto somà quasi gentile: "Ciò, arbitro!!!
Quante patate gavaràea magnà to mare par fare un gnoco come ti!
Altro problema ze le frasi de auguri par un matrimonio: 'na volta la frase tipica
gera questa: "Ogi profumo di rose, doman sorisi de binbi" vacada granda
senpre scopiassà chissà dove. Al giorno de oncò l'augurio
de fare tanti putei più che altro sona come na maledission..., se dise
infati che: "I fiòi ze la benedission del matrimonio... e la maledission
del fidansamento!". Ve sugerimo perciò la frase adata, sintetica ma
sicuramente apressà: basta scrivere: "Bonanote". I sposi apressarà
de sicuro....
Eco un telegrama spiritoso da lèsare ai sposi durante l'ingolfata che segue
la cerimonia, e che farà restare de caca i sposi fin ala fine dela letura
e pissarse in braghe i invitati: "Inpossibilità partecipare vostro
matrimonio, parché no mi gavette invità, (qua i sposi tacarà
sùare) ve auguro lo stesso 'na bea festa e 'na bonanote. Aspetatemi, rivo
fra nove mesi, vostro filio Gigeto!!!"
